Timor-Leste fiskaliza buat ne'ebe nia rasik seidauk bele sukat

Timor-Leste fiskaliza buat ne'ebe nia rasik seidauk bele sukat

Iha semana kotuk, autoridade sanitária fó sai avizu ba populasaun Oé-Cusse atu labele konsumu tua destiladu lokál balun, hafoin teste laboratóriu nebe hatudu risku ba saúde. Intensaun loos no avizu nebe klaru no loos. Maibé mosu pergunta ida ne'ebe la’os de'it konaba Oé-Cusse, nia kobre rai laran tomak: reprova kontra saida?

Ida ne’e pergunta teknika, maibé ho nia konsekuénsia nebe klean tebes. Fatus nebe la-konfortável mak: Timor-Leste seidauk iha padraun nasionál ida nebe defini parametru no limite numeriku, saida mak garante tua destiladu nebe  seguru, tantu artesanál ka industriál.

Fatus no la’os opiniuan

Ita iha regras ba komersializasaun tua-sabu (Diploma Ministeriál Konjuntu n.º 7/2008) no iha regra ba lisensiamentu estabelesimentu sira. Ita mos Iha instituisaun ida ne'ebe nia knaar atu garante norma no kualidade, Instituto para a Qualidade de Timor-Leste (Dekretu-Lei n.º 10/2018).

Maibé buat esensiál ne'ebe seidauk iha mak: padraun produtu ho parametru ne'ebe defini nia seguransa atu konsumu. Ezemplu balun mak:

• Metanol nia limite máximu hira?
• Álkol superiór hira?
• Metál pezadu hanesan chumbo hira?
• Tenki deklara teor etanol?

La ho informasaun hirak ne’e deskrita iha normas ka portarias, fiskalizasaun bele la’o maibe ita bele dehan kontra buat mamuk ida. Ho liafuan seluk, hetan problema maibe laiha régua atu sukat.

Produtu artesanál no industriál: orijen lahanesan maibé nia risku hanesan

Produsaun artezanál, tua ne'ebe destila husi alambike improvizadu, iha perigu boot liu ba metanol nebe la-haketak husi frasaun destiladu, halo ema matan-delek no bele mos fo risku ba vida. Bele mos mosu kompostu perigozu seluk hanesan Carbamato de Etila (produtu kauza kanker), wainhira kondusaun ba fermentasaun laloos. Maibe iha produsaun industriál, risku ne’e la-lakon: iha mos kontaminasaun ho metais pezadu, adulterasaun ho álkol nebe la’os potável, aditivu la-iha autorizasaun no rotulajen nebe iregular. Tan ne’e parámetru hirak ne’e tenki sai kontrolu ba produtu hotu tantu artezanál no industriál.

Iha baze teknika maibé la bele kopia de'it

Timor-Leste la-presiza inventa husi zero. Iha referénsia internasionál ne'ebe estavel ona, nebe estabelese limite ba kontaminante, metál pezadu, aditivu, no konpostu sira seluk. Maibé iha nuansa ida nebe importante tebes mak referénsia sira ne'e la kompletu atu adota, kada norma kobre parametru nebe hanesan maibe la-iha tratamentu uniforme entre sira.

Ita iha rekursu Timor oan kapasitadu barak ona (lapresija ema rai liur balun nebe mai atu hanorin ita no dada tempu ho informasaun limitadu tan deit ita nia ignoransia no tan ita la-serbisu hamutuk), atu adota no aselera normas, halo validasaun ba métodu anális (hanesan kromatografia gazoza ba metanol, álkohol superiór no kompostu organiku seluk, espektrometria absorsaun atomika ba metál pezadu) no garante mos kapasidade laboratóriu tuir ISO/IEC 17025.

Husi problema saúde ba oportunidade ekonómika

Iha ne'e mak pontu ida nebe importante tebes. Defini padraun la'ós de'it atu hapara buat nebe at, maibe loke mós odamatan ba oportunidade. Tua-sabu mak patrimóniu kultural no ekonomiku. Ho padraun identidade no kualidade, kontrolu metanol, no kompostu seluk nebe kredível, nia la'ós ona sai risku ba produtu klandestinu maibe bele sai ona produtu legál, rastreável, no potensial mos ba exportasaun. Ezemplu, cachaça iha Brazil ka Tequila iha México. Ho kapasidade teknika mak bele proteje saúde públika no loke mos industria lokál formál.

Buat nebe falta, la-rezolve ho liafuan de'it

Timor-Leste presiza, ho urjénsia, buat tolu konkretu:

Padraun nasionál ba tua destiladu (tua-sabu), ho parametru no limite ho fundamentu tekniku.

Kapasidade laboratóriu akreditada (ISO/IEC 17025) atu prodús rezultadu nebe konfiável atu defende konsumidor no soberania.

Sistema konformidade ida nebe bele akompaña produtór artesanál (formasaun, lisensiamentu, kontrolu metanol) no produtu industriál (rótulu, rastreabilidade, teste lote).

Buat sira ne'e la'ós imposível. Maibé nia ezije koñesimentu espesializadu iha kímika analítika, metrolojia no seguransa alimentár. Kompeténsia hirak ne’e rai laran presiza mobiliza lais, tanba kada tinan ne'ebe liu, laiha padraun, hanesan tinan ida tan ne'ebe ita lahatene saida mak ita hemu.

Autor

Prof. Julião Pereira

Kurikulu peskizador: http://lattes.cnpq.br/0877786097301308